सेन्ट हेलेना । के कुनै जीव करिब दुई शताब्दीसम्म बाँच्न सक्छ? सुन्दा असम्भवजस्तो लागे पनि जोनाथन नामको विशाल कछुवा यसको असाधारण उदाहरण बनेको छ। गिनिज वर्ल्ड रेकर्ड्सका अनुसार जोनाथनको उमेर सन् २०२६ मा कम्तीमा १९४ वर्ष पुगेको अनुमान गरिएको छ। उनलाई सन् २०२६ मा Guinness World Records ICON का रूपमा समेत सम्मान गरिएको छ।

जोनाथन Seychelles giant tortoise प्रजातिको कछुवा हुन्। उनको जन्म करिब सन् १८३२ मा भएको अनुमान छ। सन् १८८२ मा सेशेल्सबाट दक्षिणी एटलान्टिक महासागरमा रहेको सेन्ट हेलेना द्वीपमा ल्याउँदा उनी पूर्ण वयस्क भइसकेका थिए र कम्तीमा ५० वर्षका भएको अनुमान गरिएको थियो। त्यसैले उनको वास्तविक उमेर १९४ वर्षभन्दा पनि बढी हुनसक्ने गिनिज वर्ल्ड रेकर्ड्सले जनाएको छ।

दुई शताब्दीको इतिहासका साक्षी

जोनाथनले मानव इतिहासका असंख्य महत्वपूर्ण परिवर्तन देखेका छन्। उनी जन्मिएको समयमा न आधुनिक इन्टरनेट थियो, न आजजस्तो यातायात र सञ्चार प्रविधि। त्यसपछि औद्योगिक विकास, विश्वयुद्ध, प्रविधिको तीव्र विस्तारदेखि मानिसको चन्द्रमामा अवतरणसम्मका ऐतिहासिक परिवर्तनहरू हुँदै गए।

सन् १८८२ देखि नै सेन्ट हेलेनाको Plantation House, अर्थात् त्यहाँका गभर्नरको आधिकारिक निवासको परिसरमा जोनाथन बस्दै आएका छन्।

उमेर बढे पनि स्वास्थ्य राम्रो

उमेरका कारण जोनाथनको दृष्टि कमजोर भएको छ र उनलाई मोतियाबिन्दुका कारण लगभग देख्न नसक्ने अवस्था रहेको गिनिज वर्ल्ड रेकर्ड्सले जनाएको छ। उनको सुँघ्ने क्षमता पनि कमजोर भएको छ। तर उनको सुन्ने क्षमता राम्रो रहेको, भोक सामान्य रहेको र उनी अझै सक्रिय रहेकोबताइएको छ।

जोनाथनले घाँस र तरकारी खान्छन्। विशेष पोषणका लागि हेरचाह गर्ने टोलीले उनलाई समय–समयमा फलफूल तथा अन्य पोषिलो खानेकुरा पनि दिने गरेको छ। उनलाई विशेषगरी स्याउ र केरा मन पर्ने बताइएको छ।

२०० वर्ष पुगेका हुन सक्छन्?

जोनाथनको उमेर १९४ वर्ष भन्ने तथ्य आफैंमा असाधारण हो। तर गिनिज वर्ल्ड रेकर्ड्सका अनुसार यो उमेर संरक्षित अर्थात् conservative estimateहो। उनी सन् १८८२ मा सेन्ट हेलेना ल्याउँदा पूर्ण रूपमा वयस्क थिए भन्ने आधारमा उमेर गणना गरिएको हो। त्यसैले उनी १९४ वर्षभन्दा पनि बढी, सम्भवतः २०० वर्ष नाघिसकेको हुनसक्ने सम्भावना समेत रहेको उल्लेख गरिएको छ।

झुटो मृत्युको खबर पनि फैलिएको थियो

सन् २०२६ को अप्रिलमा सामाजिक सञ्जालमा जोनाथनको मृत्यु भएको झुटो दाबी फैलिएको थियो। त्यसपछि सेन्ट हेलेना सरकारबाट जोनाथन जीवित र स्वस्थ रहेको पुष्टि गरिएको थियो। गिनिज वर्ल्ड रेकर्ड्सले पनि उक्त दाबीलाई गलत भन्दै जोनाथन जीवित रहेको स्पष्ट पारेको थियो।

जीवित इतिहासको प्रतीक

जोनाथन आज केवल विश्वकै सबैभन्दा वृद्ध ज्ञात स्थलचर जीवका रूपमा मात्र चर्चित छैनन्। उनी सेन्ट हेलेनाका लागि दीर्घायु, धैर्य, निरन्तरता र सहनशीलताको प्रतीक समेत बनेका छन्।

करिब दुई शताब्दी लामो जीवनयात्रा पूरा गरिरहेका जोनाथनले एउटा असाधारण प्रश्न भने छोडेका छन्—मानव सभ्यताले जति ठूलो परिवर्तन देख्यो, त्यति नै लामो समयसम्म एउटा जीव कसरी बाँच्न सक्छ?

उनको जीवन अहिले वैज्ञानिक र जीवप्रेमीहरूका लागि मात्र होइन, सम्पूर्ण विश्वका लागि एउटा अद्भुत प्राकृतिक कथा बनेको छ।